إسكريبت ملك فؤادي بقلم لؤه ابراهيم
انت في الصفحة 1 من 4 صفحات
سابها بعد كتب كتابهم بيومين
مش عارفة ليه مع انهم بيقولوا كان بيحبها اوي!
كنت سامعة كلامهم وساكته
محبتش أرد ولا احسسهم إني سامعة
هما مش أول ناس يتكلموا في الحكاية دي
ولا أول ناس يجيبوا في سيرة الي فات
أنا اتعودت على سيرتك الى بقت تتذكر
قدامي اكتر من آي حاجة في الدنيا!
انت مشيت ولسة سيرتك
معرفش ليه!
طلبت أوبر علشان كنت محتاجة
اوصل ب أقصى سرعة ل السوبر چيت
فتحت شنطة الضهر بتاعتي وانا بخرج
منها شنطة الميكب الصغيرة بتاعتي
ملحقتش أحط ميكب فمكنش قدامي
غير المرايا الصغير وميكب بسيط جوة أوبر
ما بردوا مكنش لازم أحجز السفرية في يومها!
التحرك كان الساعة ١٢ بليل
وصلت مكان التجمع وقررت إني قبل
ما أركب لازم أجيب شوية سناكس
روحت أقرب ماركت وجبت كل الحاجات
الي ممكن أحتاجها في الطريق
وركبت وبدأت رحلتي
ل البلد السحرية دهب
معرفش إيه الي خلاني اروح نفس البلد
الي كانت شاهدة على قصة حبنا
أو قصة حبي أنا ليك
كان جوايا شعور إني لازم أروح علشان
مبقتش موجود وفات سنتين على فراقنا
وكان لازم أنسى!
فتحت ال Playlist واشتغلت أغنية
ل عمرو دياب
كانت أغنيتنا المفضلة سوا
كنا بنسمعها طول سفرية دهب الأولى
طريق دهب يجنن مكنتش بحب أنام وانا مسافرة بفضل صاحية بتفرج على الطريق
انا وال سناكس بتاعتي وعمرو دياب
ولأني حافظة دهب حتة حتة مكنتش
محتاجة اتنقل مع الشركة وقررت
إني هستمتع لوحدي
دخلت أوضتي ولبست دريس أبيض يجنن
وباج خوص لذيذة اوي
وسليبر شبهه
فردت شعري وحطيت ميكب لذيذ
وخدت معايا شال صغير في الشنطة
إحنا في يناير الجو مش بيهزر ابدا
دافي ولذيذ اوي
روحت مكان في آخر الممشى إكتشفته
في آخر سفرية ليا انا وآدم
مكان تحت جسر على البحر على طول
بيكون فاضي ورايق
مبيكونش في صوت غير صوت المزيكا
الي بتكون خارجة من الكافيهات حوالينا
ركنت شنطتي وقلعت السليبر وأنا
بتحرك على الرمل برجلي
غمضت عيوني وانا بفتكر آخر مرة
كان بعد حفلة كتب كتابنا بيوم
وقتها كنا بنجهز لفرحنا وجه
اخدني خرجني
مكنش فيه آي حاجة غريبة خالص
كنا جوز عصافير حب
إتفقنا إنه هيجي ياخدني بكرة الصبح من البيت انا وماما للفندق
علشان الميكب آرتيست هتيجي بدري
وهحتاج أكون هناك بدري
اتغدينا ودخلنا السنيما وروحني البيت
وقبل ما أطلع طبع بوسة على خدي وودعني!
ودعني على أساس إنه هيجي بكرة
بقالي سنتين بستناه ومرجعش!
